RUS DONANMASININ TERME'YE ÇIKARDIĞI ERMENİ EŞKİYASININ YAPTIĞI MEZÂLİM
Rus donanması tarafından Terme'ye çıkarılan Ermeni eşkiyasınca dokuz kişinin şehid edildiği, iki kişinin yaralandığı ve on dokuz kişinin de bir kısmının kendi isteği ile bir kısmının da esir olarak götürüldüğü, ayrıca 3.100.000 kuruş kıymetinde maddî zarar verildiği tespit edildiğinden, Müslüman esirlere karşılık Rus tebeasından yirmi şahsın tevkif edildiği, şehid ve yaralılara tazminat alınmasının temini için dokuz kişinin daha tevkif edilmesi ve tazminat mikdarının tespit edilmesi hakkında.
Bâb-ı Âlî
Dâhiliye Nezâreti
Emniyyet-i Umûmiyye Müdîriyeti
Rus donanması tarafından Terme'ye çıkarılan Ermeni eşkıyâsı tarafından ihrâk edilen mebânî-i resmiyye ile telefât mikdârını vesâ’ireyi mübeyyin cedvelin sûretidir.
Dokuz şehîd
İki mecrûh
On dokuz esîr Aslına mutâbıkdır.
Fî 15 Kânûn-ı Evvel sene 1332
Emniyyet-i Umûmiyye Kalem-i Husûsî Müdîriyeti
Bin üç yüz otuz iki senesi Teşrîn-i Evvel'in yirminci perşenbe günü Rus donanması tarafından çıkarılan Ermeni çeteleri Terme kazâsına duhûl ederek ihrâk etmiş oldukları mağaza, dükkân, kahve, otel, hân ve hâne eşyası, dükkân eşyası vesâ’ire, ma‘rifetimizle bi'l-keşf esâmîsi bâlâda muharrer olduğu üzere cem‘an üç milyon yüz bin guruş kıymetinde zarar u ziyân vukû‘ bulduğunu tasdîk ederiz.
Fî 23 Teşrîn-i Sânî sene 1332
Bâb-ı Âlî
Hâriciye Nezâreti
Umûr-ı Siyâsiyye Müdîriyyet-i Umûmiyyesi
Mühimme Kalemi
Umûmî numara: 91604
Husûsî numara: 1794
22 Kânûn-ı Evvel [1]332
Fî 3 Kânûn-ı Sânî [1]916 [1917]
Dâhiliye Nezâretine
Emniyyet-i Umûmiyye Müdîriyeti İkinci Şu‘besi'nden muharrer 15 Kânûn-ı Evvel sene [1]332 târîhli ve 217 husûsî rakamlı tezkire-i aliyye-i âsafâneleri ahzolundu.
Ermeni eşkıyâsı tarafından Terme'ye vukû‘ bulan ta‘arruzda asker de dâhil olmak üzere dokuz şehîd ve iki mecrûh zâyi‘âtımız olduğu ve on dokuz kişinin esîr götürüldüğü sâlifü'z-zikr tezkire-i devletlerine melfûf cedvelin mütâla‘asından müstebân olmuşdur. Esîr edilen Müslimlere mukâbil Rusya tebe‘asından yirmi şahsın tevkîf edildiği anlaşılmakda ise de, şühedânın â’ileleri ve mecrûhîn için tazmînât istihsâli zımnında da tevkîfât icrâsı müterettib olduğundan işbu yirmi kişiden mâ‘adâ tebe‘a-i merkûmeden ayrıca dokuz şahsının[şahsın] tevkîfiyle diyâr-ı ba‘îdeden birine i‘zâmları ve şehîd â’ileleriyle mecrûhîn için istihsâli lâzım gelen tazmînât mikdârı da takdîr ve tahmîn olunarak mevkûfînin isimleriyle birlikde nezâret-i âcîziye iş‘ârı mütemennâdır.
Tevkîf edilen yirmi kişi miyânında bulunan Nikola Kakolidis, Gabriyel Kotanof nâmlarındaki eşhâsın seyri ilerlemiş verem illetine mübtelâ oldukları Amerika Sefâreti'nden beyân edilmiş ve kezâlik mevkûfînden altmış yaşlarındaki Jorj Korubakalis (Georges Cauroubakalis) nâmındaki şahsın da romatizma, âlâm-ı kebediyye, sarılık ve iltihâb-ı mesâneye mübtelâ idüğü sefâretden gönderilen tabîb raporunda tezkâr kılınmış olmağla ifâdât-ı mezkûre sahîh olduğu takdîrde bunların yerine tâmmü's-sıhha kesân tevkîf edilmesi için iktizâ-yı hâlin inbâsı menût-ı himem-i aliyye-i âsafîleridir. Emr ü fermân.
(Hasârât-ı mâddiyye üç milyon yüz bin guruş kıymetindedir. Tazmîn-i hasârât ne sûretle icrâ etdirilmek münâsib olacağını ta‘yîn için müsteşâr beyefendi hazretleri hukûk müşâvirimiz efendiyle görüşeceklerdir. Pusulası müsteşâr beyefendiye takdîm edilmişdir.)
Pusula Hukûk Müşâvirliği'ne havâle buyuruldu.
Askerler muhârebe-i muntazamada terk-i hayat etmediklerinden ve esîr gidenlerden ihtiyârıyla iltihâk edenlerin tefrîki kâbil olmadığından cümlesi hakkında mukâbele-i bi'l-misle karâr verilmişdir.
BOA. HR. SYS. HU, kr. 122, dos. 7, nr. 1, 11-12, 29, 31, 1916. XI. 13
Hiç yorum yok:
Yorum Gönder