Tarihi Bir Belge

---

SAMSUN HÜKÜMET DAİRESİ YANDIĞINDAN BİR MAĞAZADA MUHAFAZA EDİLEN EVRAK İÇİN HÜKÜMET KONAĞI İÇERİSİNDE BİR MAHZEN YAPTIRILMASI

Samsun hükümet dairesinin yanmasından dolayı evrak ve kuyudatın bedestende kiralanan bir mağazada saklandığı evrakın hergün getirilip götürülmesinin zor ve geceleri dairede kalmasının mahzurlu olduğu bu sebeple hükümet dairesi içinde bir evrak mahzeni inşası için gerekli meblağın inşaat ve tamirat tertibinden karşılanması.

5 Mayıs 1894

Bâb-ı Âlî

Dâ’ire-i Sadâret

Âmedî-i Dîvân-ı Hümâyûn

2439

Devletlü efendim hazretleri

Samsun hükûmet dâ’iresinin mukaddemâ muhterik olmasından dolayı evrâk ve kuyûdât dâ’ire-i hükûmete bir çâr-ı yek mesâfede vâki‘ bedestânda istîcâr olunan mağazada hıfzolunmakda ise de bunların her gün celb ve nakli müte‘assir ve evrâkın leylen dâ’ire-i hükûmetde bırakılması mahzûrdan gayr-ı sâlim bulunduğundan ber-mûceb-i keşf otuz bir bin dört yüz seksen altı guruşla dâ’ire-i hükûmetde bir mahzen-i evrâkın inşâsı ve meblağ-ı mezkûrun üç yüz on senesi inşâ’ât ve ta‘mîrât tertîbinden tesviyesi husûsunun Mâliye Nezâret-i Celîlesi'ne havâlesi tezekkür kılındığına dâ’ir Şûrâ-yı Devlet Dâhiliye Dâ’iresi'nden verilen mazbata arz u takdîm kılınmış olmağla ol bâbda her ne vechle irâde-i seniyye-i hazret-i hilâfet-penâhî şeref-müte‘allik buyurulur ise mantûk-ı münîfi infâz olunacağı beyânıyla tezkire-i senâverî terkîm kılındı efendim.

Fî 26 Şevvâl sene [1]311

Sadr-ı a‘zam ve Yâver-i ekrem

Fî 20 Nisan sene [1]310

Cevad  

               

Ma‘rûz-ı çâker-i kemîneleridir ki

Resîde-i dest-i ta‘zîm olup melfûfu ile manzûr-ı âlî buyurulan işbu tezkire-i sâmiye-i sadâret-penâhîleri üzerine mûcebince irâde-i seniyye-i cenâb-ı hilâfet-penâhî şeref-müte‘allik buyurulmuş olmağla ol bâbda emr ü fermân hazret-i veliyyü'l-emrindir.

Fî 29 Şevvâl sene [1]311 ve

Ser-kâtib-i Hazret-i Şehriyârî

Fî 23 Nisan sene [1]310

Bende              

Süreyya           

BOA. İ. Maliye 1311 L./20