Dâhiliye Nezâreti
Kalem-i Mahsûs Müdîriyeti
Evrâk-ı Umûmî Numarası: 574
Târîhi: 9 Haziran sene [1]335
Şifre
Trabzon ve Sivas Vilâyetleri'ne
Canik Mutasarrıflığı'na
İngiltere Fevkalâde Komiseri Sir Arthur Calthorpe'tan alınan takrîrde Samsun'dan kendisine vâki‘ olan ihbârâta nazaran mahall-i mezbûrda sû’-i niyet ashâbından bazı eşhâsın emniyet ve âsâyiş-i memleketi ihlâl ve kargaşalık ihdâsına tasaddî eyledikleri ve işbu harekât-ı ihtilâl-cûyânede Mustafa Kemal Paşa'nın dahl-i küllîsi bulunduğu beyânıyla dâhil-i memleketde vukû‘a gelecek her gûnâ şûrişin ve bilhâssa beyne'l-anâsır ve dînî bir mâhiyet iktisâb eyleyecek her türlü harekâtın tevlîd eyleyeceği son derece vahîm netâyic üzerine Hükûmet-i Seniyye'nin nazar-ı dikkati celb ediliyor. Vâki‘ ise nerelerde ne gibi vekâyi‘ ihdâsına ne sûretlerle teşebbüs edildiği hakkında bizzât icrâ kılınacak tahkîkât netîcesinin âcilen inbâsı ve tedâbîr-i mâni‘a-i kat‘iye ittihâzıyla siyâset-i Osmaniye'nin salâha yüz tutduğu şu ân-ı mühimde hükûmeti müşkil mevki‘de bırakacak teşebbüsâta zinhâr meydân ve imkân bırakılmaması ehemmiyetle tavsiye ve âsâr-ı fi‘liyesine intizâr olunur.
BOA, DH. KMS, 53-1/43_1
Hiç yorum yok:
Yorum Gönder