Bâb-ı Âlî
Hâriciye Nezâreti
Kalem-i Mahsûs
Umûmî Numara: 16610
Husûsî Numara: 253
Fî 29 Haziran sene [1]335 / sene [1]919
Sadâret'e
Mustafa Kemal Paşa'nın azledildiği kendisine teblîğ olunduğu hâlde müşârun-ileyhin hâlâ İstanbul'a gelmeyerek Vilâyât-ı Şarkıye'de dolaşması ve bazı teşkîlât icrâsıyla tahrîkâtda bulunmakda olması gâyet vahîm netâyic tevlîd edeceğinden bahisle paşa-yı müşârun-ileyhin hemen buraya celbi Düvel-i Mü’telife mümessilleri ve bilhâssa İngiliz mümessili tarafından ale't-tevâlî ve musırrâne taleb edilmekdedir.
Geçenlerde nezd-i çâkerîye gelen Fransa Fevkalâde Komiserhânesi Müşâvir-i siyâsîlerinden Mösyö Ledoux dahi Balıkesir 'de ahâliye esliha tevzî‘ edilmekde ve bazı kimseler tarafından gönüllü efrâd toplanılmakda olduğunu ve bunlara her ne kadar elbise-i askeriye iksâ edilmemiş ise de alâmet-i fârika olarak "pazu-bend" taşıdıkları ve bu gibi ahvâlin pek vahîm netâyic tevlîd etmesi âzâde-i kayd-ı iştibâh idiğini söylemişdir.
Gönüllü efrâd cem‘i ve bazı yeni teşkîlâtlar yapılması kuvâ-yı mevcûdemizi mümkin olduğu kadar tahdîde çalışan Düvel-i Mü’telifece yeni bir seferberlik gibi telakkî edilmesi muhtemel bulunduğundan ve bu ise Hükûmet-i Seniyye'ye yeniden yeniye gavâ’il-i azîme ihdâsına sebeb olacak bir mâhiyetde olduğundan husûsât-ı vâkı‘a hakkında nazar-ı dikkat-i fahîmânelerini celbe ictisâr eylerim. Fermân.
BOA, HR. SYS, 2608/6_3
Hiç yorum yok:
Yorum Gönder