Me’mûriyetinden Azli'ne Emr ü fermân

Bâb-ı Âlî

Hâriciye Nezâreti

Mühimme Kalemi

16208-574

Müsta‘cel

Dâhiliye Nezâret-i Celîlesi'ne

Devletlü efendim hazretleri,

İngiltere Fevkalâde Komiseri Sir Arthur Calthorpe' tan 8 Haziran [1]919 târîhiyle vârid olan bir takrîrde Samsun'dan kendisine vâki‘ olan ihbârâta nazaran mahall-i mezbûrda sû’-i niyet ashâbından bazı eşhâsın emniyet ve âsâyiş-i memleketi ihlâl ve kargaşalık ihdâsına tasaddî eyledikleri ve işbu harekât-ı ihtilâl-cûyânede Mustafa Kemal Paşa'nın dahl-i küllîsi bulunduğu ve mûmâ-ileyhin me’mûriyetinden azli zımnında Karadeniz Kuvve-i Askeriyesi Başkumandanlığı cânibinden Harbiye Nezâret-i Celîlesi'ne teblîgât-ı lâzıme îfâ edildiği ba‘de'l-ityân dâhil-i memleketde vukû‘a gelecek her gûnâ şûrişin ve bilhâssa beyne'l-anâsır ve dînî bir mâhiyet iktisâb eyleyecek her türlü harekâtın tevlîd eyleyeceği son derece vahîm netâyic üzerine nazar-ı dikkat celb edildikden sonra havza-i me’mûriyetleri dâhilinde ser-zede-i zuhûr olacak muhill-i âsâyiş her bir hareketden dolayı kendilerinin bizzât mes’ûl ve mu‘âteb tutulacaklarına dâir me’mûrîn-i mülkiyeye serî‘an ta‘lîmât-ı mukteziye i‘tâsıyla Samsun'daki vaziyet-i hâzıra hakkında kendisinin bi-tamâmihâ haberdâr edilmesi iltimâs edilmekdedir. Ma‘lûm-ı devletleri olduğu üzere Meclis-i Vükelâ karârıyla Mustafa Kemal Paşa'nın me’mûriyetine hitâm verilip Dersaâdet'e celbi Harbiye Nezâret-i Aliyyesi'ne havâle olunmuş olmağla taraf-ı âlîlerinden dahi emniyet ve âsâyiş-i umûmînin her türlü halelden vikâyesi esbâbının istikmâli zımnında oradaki me’mûrîn-i mülkiyeye vesâyâ-yı ekîde îfâsı ve bu emr-i mühimmin îfâsında taksîri görülenlerin şiddetle mu‘âteb ve mes’ûl tutulmaları ve bir tarafdan da İngiltere fevkalâde komiserine vâki‘ olan ihbârâtın derece-i sıhhatinin tebyîni zımnında tahkîkât icrâ etdirilerek netîcesinden âcizlerinin dahi haberdâr edilmesi menût-ı re’y-i âlî-i nezâret-penâhîleridir. Emr ü fermân hazret-i men-lehü'l-emrindir.

Fî 10 Ramazan sene [1]337 ve fî 9 Haziran sene [1]335

Hâriciye Nâzır Vekîli

(İmza)           

BOA, DH. KMS, 53-1/43_2  

www.devletarsivleri.gov.tryayinosmanli elgelerleataturk .htm