Bâb-ı Âlî
Hâriciye Nezâreti
Tercüme Müdîriyeti
Hâriciye Nezâret-i Celîlesi'ne
17 Haziran 1919 târîhiyle İngiliz Fevkalâde
Komiserliği'nden vârîd olan 2002 numaralı takrîrin tercümesidir.
[1]-Huzûr ve âsâyişin bir kat daha te’mîn ve muhâfazasına medâr olmak üzere her biri erkân-ı askeriyeden bir zâtın kumandası tahtında olarak Anadolu'nun on mıntıkaya taksîmini müş‘ir 6 Haziran târîhli ve 249 numaralı müzekkire-i aliyye-i âsafâneleri resîde-i dest-i ta‘zîm oldu. Zât-ı âlî-i âsafâneleri bu mes’ele hakkında Mösyö Ryan'a bazı evrâkın tevdî‘ edildiğini dahi iş‘âr buyurmuşlardır.
2-Zât-ı âlî-i âsafânelerince gâlibâ şurası unutulmuşdur ki evrâk-ı mezkûre henüz vukû‘ bulmayan te‘âtî-i efkâra bir esâs teşkîl etmek üzere Mösyö Ryan'a tevdî‘ edilmiş idi. Bundan mâ‘adâ ma‘iyyet-i senâverânem erkânından hiçbiri müfettiş-i askerî paşalara verilecek olan ta‘lîmâtnâmenin bir nüshasına dest-res olmamışdır.
3-İşbu tasavvurun efkâr-ı senâverâneme tevâfuk etmediğini zât-ı âlî-i âsafânelerine bildirmekle kesb-i fahr ederim. Mirlivâ Mustafa Kemal Paşa'nın Samsun mıntıkasında vukû‘ bulan me’mûriyeti şimdiden bir takım netâyic-i mü’essifeye sebebiyet vermişdir. Hıristiyan ahâli ye îkâ‘ etdiği sâbit olan muhâtarâtın daha büyüklerini istilzâm etmek mâhiyetini hâiz bir takım teşebbüsâtı tasvîb edemem.
4-Binâen-aleyh mıntıkaların teşkîli hakkındaki nizâmnâmenin te’hîr ve ta‘lîkıyla paşa-yı mûmâ-ileyh ile refâkatinde bulunan zâbitânın kâffesinin Dersaâdet'e hemen celbi için serî‘an evâmir-i kat‘iye verilmesini Hükûmet-i Osmaniye'den taleb ederim.
5-İşbu metâlibe muvâfakat edilir edilmez senâverlerine ma‘lûmât i‘tâ buyurulmasını dahi ayrıca ricâ ederim.
BOA, HR. SYS, 2606/1_30
Hiç yorum yok:
Yorum Gönder