Taraf-ı Sâmî-i Hazret-i Sadâret-penâhîden Havâle Buyurulan 20 Temmuz Sene 1312 Târihli Tezkire-i Ser‘askerînin Sûretidir.
Zeytun'da Nezret Çavuş nâmına Kayseriyye'den gelen bir mektupda komiteye fevka'l-had fedâkârlıkta bulunan küçük Hasan'ın derdest edildiği ve böyle hidemâtı sebkat etmiş bir adamın dûçâr-ı mücâzât-ı şedîde olması yakışmayacağından Kayseriyye re’îs ve hâkim ve a‘zâsına rüşvet verilmek üzere yüz lira bulunup gönderilmesi ve şâyed gönderilmediği takdîrde dörtler ve yedilerin hayatı tehlikede bulunduğu iş‘âr kılındığına ve Sivas İttihâd Komitesi mührüyle ve 23 Haziran sene 1312 târihiyle Zeytun ağalarına mevrûd mektupda da Sivas'da [409] bulunan komiteye Kayseri ve Yozgad'dan üç yüz kadar piyâde ve süvârînin inzimâm eylediğinden ve bunların bir kısmı mahallî hükûmetini işgâle kâfî bulunduğu cihetle diğer kısmının da Zeytun'a gönderilmesi mukarrer idüğünden hangi tarîkden ve ne sûretle gelmeleri eslem ise ona göre hareket etmek üzere bir iki kılavuzun irsâli ve Zeytun havâlîsindeki asâkir-i şâhânenin mikdârıyla işgâl ettikleri mevâkı‘ hakkında ma‘lûmât i‘tâsı ve Zeytunluların kendilerine ittibâ‘ edip etmeyeceklerinin bildirilmesi dermiyân kılınmış idüğüne ve Zeytun ağaları tarafından dahi: “Bizim çektiğimiz bize kâfîdir. Onlar arzu ediyor ise bulundukları mahalde fesâd çıkarsınlar.” zemîninde cevâb verdikleri icrâ edilen tahkîkâtdan anlaşıldığına ve ta‘mîk-i tahkîkâta devâm edilmekde olduğuna ve Samsun'a tâbi‘ Çarşamba kazâsının Kapıkaya ahâlîsinden olup mahbesden firâr etmiş olan Minas'ın başına üç yüz elli kadar avene toplayarak Sivas ve Merzifon'la muhâbere etmekte olduğu ve o taraflarda bir fesâd çıkarmak istediği istihbâr kılındığına dâir Haleb ve Adana Fevka'l-âde Kumandanlığı'ndan vârid olan üç kıt‘a telgrafın sûret-i mahlûleleri manzûr-ı sâmî-i dâver-i efhamîleri buyurulmak üzere matviyyen takdîm kılınmış ve Sivas ve Kayseriyyece marzî-i âlîye muhâlif bir hâl ve hareket vukû‘a getirilmemesi esbâbının istikmâliyle beraber merkûm Minas ile avenesinin istîsâllerindeki emrinde mahallince tedâbîr-i lâzıme ittihâz olunup olunmadığının Samsun Kumandanlığı'yla bi'l-muhâbere netîcesinin bildirilmesi zımnında Dördüncü Ordu-yı Hümâyûn Müşîriyyet-i Celîlesi'ne bâ-telgraf vesâyâ-yı lâzime îfâ kılınmış olmağla, ol bâbda.
Hiç yorum yok:
Yorum Gönder